Mikilvæg ákvörðun

Vegna mótframlags launagreiðanda og hagstæðrar skattlagningar stenst enginn annar sparnaður samanburð við séreignarsparnað. Til lengri tíma litið munar milljónum. Þeir sem nýta sér ekki þennan möguleika til séreignarsparnaðar eru því í raun að missa af umsömdum kjarabótum.

Eigið framlag 2% út árið 2014
Eigið framlag til séreignarsparnaðar þarf að vera 2% af launum á tímabilinu 2012-2014. Ástæðan er tvíþætt; annars vegar þarf að leggja 2% í séreignarsparnað til þess að njóta 2% mótframlags atvinnurekanda og hins vegar að þannig er skattfrestunarheimild fullnýtt. Að óbreyttum lögum hækka skattleysismörk eigin framlags að nýju í 4% frá janúar 2015, eins og þau hafa verið í fjölda ára. Launagreiðendum ber að gæta réttra skila í samræmi við lög og samninga.   

Dæmi
Í dæminu er miðað við 300.000 kr. mánaðarlaun og 2% eigið framlag í séreignarsparnað.

Þú leggur fyrir 2%	6.000 kr.
Atvinnurekandi 2% mótframlag	6.000 kr.
Samtals í sparnað á mánuði 4%	12.000 kr.

• Einstaklingur leggur fyrir sjálfur 2% af launum sínum en fær með mótframlagi atvinnurekanda alls 4% af mánaðarlaunum í séreignarsparnað á mánuði.
• Skattfrestun - útborguð laun lækka einungis um 3.586 kr. m.v. 40,24% skattprósentu (laun yfir 230.000 kr. á mánuði). 
• Í séreign leggjast því 12.000.- kr. á mánuði, en ráðstöfunartekjur viðkomandi lækka aðeins um 3.586 kr.   

Eins og sést á þessu dæmi er séreignarsparnaður sparnaðartækifæri sem enginn ætti að missa af.

Séreign hjá Sameinaða lífeyrissjóðnum
Kostir séreignarsparnaðar Sameinaða lífeyrissjóðsins eru ótvíræðir.

• Ekki er greiddur fjármagnstekjuskattur né erfðaskattur.
• Séreignarsparnaður skerðir hvorki barna- né vaxtabætur.
• Útgreiðsla séreignarsparnaðar skerðir ekki ellilífeyri almannatrygginga.
• Staðgreiðsla tekjuskatts af séreignarsparnaði frestast þar til að útborgun kemur.
• Séreignarsparnaður erfist að fullu og er ekki aðfararhæfur, lendi viðkomandi í fjárhagserfiðleikum.
• Val er um að ávaxta eign samkvæmt Aldursleið, þar sem áhætta fjárfestinga fylgir aldri eða í einstöku safni fjárfestinga sem Aldursleiðin byggist á. Einnig býður sjóðurinn Innlánsleið, þar sem séreignin ávaxtast eingöngu á innlánsreikningum, að stærstum hluta verðtryggðum.
• Hægt er að skipta um ávöxtunarleið án kostnaðar.
• Á sjóðfélagavefnum á heimasíðu sjóðsins er hægt að fylgjast með þróun eigin séreignar. Þar er eignin uppfærð daglega.

Þú getur reiknað út þinn séreignarsparnað hér.