Fréttir
Frumvarp: Tímabundin breyting á séreignarsparnaði
Rétthafar séreignarsparnaðar munu geta tekið út allt að 1 milljón króna af inneign sinni, óháð aldri og öðrum núgildandi takmörkunum, ef stjórnarfrumvarp sem birt var á vef Alþingis í dag verður að lögum. Samkvæmt frumvarpinu verður þetta heimilt á tímabilinu 1. mars 2009-1. október 2010 og dreifist útborgunin á 9 mánuði, sem þýðir tæplega 70.000 krónur á mánuði eftir staðgreiðslu skatta miðað við hámarksútborgun. Útborgunin mun ekki skerða barnabætur, vaxtabætur né atvinnuleysisbætur verði frumvarpið óbreytt að lögum.
Í athugasemdum með frumvarpinu segir m.a. að þessi leið sé fyrst og fremst hugsuð til að koma til móts við þá sem eiga í tímabundnum fjárhagserfiðleikum, t.d. vegna atvinnuleysis, án þess þó að vera skilyrði fyrir útborgun. ,,Hins vegar má gera ráð fyrir að þessi kostur höfði fyrst og fremst til þeirra sem eiga í einhverjum fjárhagsvandræðum, í ljósi þess hversu verðmætt sparnaðarform séreignarsparnðurinn er fyrir velflesta", segir ennfremur í athugasemdum með frumvarpinu. Og til hvatningar þeim er hafa svigrúm til áframhaldandi sparnaðar er í frumvarpinu lagt til að draga megi allt að 6% framlag í séreignarsparnað frá tekjuskattsstofni á tímabilinu 1. mars 2009-1.október 2010, en hámarkið er nú 4%.
Staða frumvarpsins: Á dagskrá Alþingis mánudaginn 9. mars, til 3. umræðu.
