Séreignarsparnaður sterkur - breytingar á útborgunarreglum

Þrátt fyrir aukið atvinnuleysi og almennan samdrátt í ráðstöfunartekjum fólks eru reglulegir greiðendur í séreignarsparnað hjá sjóðnum fleiri í lok þessa árs en í upphafi þess. Það bendir til mikils vilja fólks til reglulegs langtímasparnaðar og einnig vísbending um að sjóðurinn njóti ágæts trausts sem vörsluaðili séreignarsparnaðar.  

Með breytingum á lögum í mars 2009 var öllum rétthöfum séreignarsparnaðar veitt tímabundin heimild til úttektar á allt að 1 milljón króna. Þess má geta að 694 rétthafar séreignarsparnaðar hjá sjóðnum, sem jafngildir 7,7% rétthafa, hafa óskað eftir slíkri útborgun. Fyrir Alþingi liggur nú frumvarp til laga sem heimilar úttekt á allt að 1,5 milljón króna frá og með 1. janúar 2010, sem kæmi til viðbótar fyrri úttektarheimild og hækkaði þannig hámarksfjárhæðin í 2,5 milljónir króna ef frumvarpið fær brautargengi á Alþingi. Sjá nánar í 40. gr. og 41. gr. frumvarpsins sem tengill er á hér að neðan.